
Эх сурвалж: Associated Press (AP) 2026 оны арваннэгдүгээр сарын 17 17:50 (Улаанбаатарын цагаар)
УЛААНБААТАР, Монгол Улс (AP). Монгол Улсын Ерөнхийлөгч Ухнаагийн Хүрэлсүх мягмар гарагт огцрохоо мэдэгдлээ. Түүнийг долоон жилийн өмнө буюу Ерөнхий сайдаар ажиллаж байх үедээ төрийн төмөр замын төслөөс санхүүгийн ашиг хүртсэн хэмээн эрх баригч Монгол Ардын Намын өөр нэгэн улс төрч буруутгасны дараа ийм мэдэгдэл хийжээ.
Улаанбаатар хотын захирагч асан Хишгээгийн Нямбаатар өнгөрсөн бямба гарагт Ерөнхийлөгч У.Хүрэлсүхийг Тавантолгой–Гашуунсухайт чиглэлийн төмөр замын төсөлтэй холбоотойгоор 25 сая ам.доллар авсан хэмээн буруутгасан байна. Хотын дарга асан Х.Нямбаатар нь Ерөнхийлөгчийн адил Монгол Ардын Намын гишүүн боловч нам доторх өөр фракцад харьяалагддаг аж.
Энэхүү буруутгал гарсны дараа сөрөг хүчний Ардчилсан нам Ерөнхийлөгчийг огцрохыг шаарджээ.
Ерөнхийлөгч У.Хүрэлсүх хууль бус үйлдэл хийсэн гэх буруутгалыг няцааж, мягмар гарагт ард түмэндээ хандаж хэлсэн үгэндээ өөрийнх нь нэр хүндэд сар гаруйн хугацаанд тасралтгүй халдаж байгааг онцолсон ч огцрох шийдвэр гаргаснаа мэдэгдсэн байна.
Тэрбээр:
Би ард түмэн, төр улсаасаа хэзээ ч хулгай хийж байгаагүй. Би Ерөнхийлөгчийн албан үүргээ хүлээлгэн өгч, жирийн иргэн болно.
гэжээ.
Мөн мөрдөн шалгах ажиллагаанд хамтран ажиллахаа илэрхийлсэн байна.
Авлигын хэрэгт холбогдсон гэх мэдээлэлд нэр нь дурдагдсан Монгол Улсын Хууль зүй, дотоод хэргийн дэд сайд Д.Мөнх-Эрдэнэ болон Засгийн газрын Хэрэг эрхлэх газрын дарга Б.Энхбаяр нар мөн мягмар гарагт албан тушаалаасаа огцрохоо мэдэгджээ.
Буруутгалд дурдсанаар У.Хүрэлсүх 2019 онд Тавантолгой–Гашуунсухайт чиглэлийн төмөр замын бүтээн байгуулалтын гэрээг өрсөлдөөнт сонгон шалгаруулалт явуулалгүйгээр Монголын томоохон бизнесийн нэгдлүүдийн нэг болох “Бодь Интернэшнл” ХХК-д олгоход нөлөөлсөн бөгөөд тус компаниас хахууль хэлбэрээр мөнгө авсан гэх мэдээлэл гарсан байна.
Харин “Бодь Интернэшнл” компани даваа гарагт гаргасан мэдэгдэлдээ төрийн өндөр албан тушаалтнууд болон төрийн албан хаагчдад бэлэн мөнгөний хахууль өгсөн гэх мэдээллийг няцаажээ. Тус компани эдгээр мэдэгдлийг гүтгэлэг хэмээн үзэж, хууль бус үйлдэл огт хийгээгүй гэдгээ мэдэгдсэн байна.
Нэгэн шинжээч Ерөнхийлөгчийн огцрох шийдвэрийг улс төрийн эрх мэдлийн тоглолт хэмээн тодорхойлжээ. Түүний үзэж байгаагаар У.Хүрэлсүх цаашид өөр албан тушаалд нэр дэвших боломжоо хадгалах зорилготой байж болох бөгөөд огцрох шийдвэр нь олон нийтийн дунд эерэгээр хүлээн авагдах магадлалтай аж.
Монгол Улсын Их Сургуулийн багш Мөнх-Эрдэнийн Гантулга:
Олон нийтийн өмнө тэр шударга, үнэнч, сайн улстөрчийн дүр төрхтэй харагдаж байна.
хэмээн ярьжээ.
Мөн У.Хүрэлсүх 2021 оны нэгдүгээр сард Ерөнхий сайдын албан тушаалаасаа огцорсон нь Ерөнхийлөгчийн сонгуульд нэр дэвших боломж бүрдүүлэх зорилготой байсан гэж М.Гантулга тайлбарласан байна. Тэрбээр үүнээс зургаан сарын дараа Ерөнхийлөгчийн сонгуульд ялалт байгуулж, Монгол Ардын Нам нь мөн тэр үед парламентын олонхын суудлыг авсан юм.
Гэвч сүүлийн жилүүдэд тус нам дотор эрх мэдлийн төлөөх зөрчил тэмцэл хурцдаж, ердөө есөн сарын хугацаанд Монгол Улсад гурван Ерөнхий сайд дараалан томилогдон ажилласан билээ.
Ерөнхийлөгч У.Хүрэлсүхийн огцрох шийдвэр нь Монгол Улсын парламент буюу Улсын Их Хурал хүлээн зөвшөөрсний дараа хүчин төгөлдөр болно.
УИХ энэ долоо хоногийн сүүлээр хуралдаж, Ерөнхийлөгчийн огцрох хүсэлтийг хэлэлцэн санал хураах төлөвтэй байна.
Хэрэв УИХ хүсэлтийг хүлээн зөвшөөрвөл УИХ-ын дарга Монгол Улсын Ерөнхийлөгчийн үүргийг түр орлон гүйцэтгэх юм.