Бичил мэдээ
Шинэ мэдээ
Их уншигдсан
АУДИО
ABBA - I Do, I Do, I Do, I Do
АРХИВ
October 2026
| Su | Mo | Tu | We | Th | Fr | Sa |
|---|---|---|---|---|---|---|
 | Монгол | 12.25% |
 | Австрали | 4.35% |
 | Швейцарь | 0.0% |
 | Канад | 2.25% |
 | Япон | 1.25% |
 | БНХАУ | 3.0% |
 | Англи | 3.75% |
 | АНУ | 4.00% |
 | ЕХУ | 2.65% |
| Su | Mo | Tu | We | Th | Fr | Sa |
|---|---|---|---|---|---|---|
| Монгол | 12.25% |
| Австрали | 4.35% |
| Швейцарь | 0.0% |
| Канад | 2.25% |
| Япон | 1.25% |
| БНХАУ | 3.0% |
| Англи | 3.75% |
| АНУ | 4.00% |
| ЕХУ | 2.65% |
Hermès-ийн алдарт Birkin цүнхийг өмнө нь дэлгүүрийн үнээс нь хоёр дахин өндөр үнээр дамлан худалдаалж, их хэмжээний ашиг олох боломжтой байлаа. Харин одоо зах зээл дээрх үнэ нь буурч, худалдан авагчдын сонирхол суларч эхэлжээ. Тансаг хэрэглээний барааны хамгийн нэр хүндтэй брэндүүдийн нэгийн амжилтыг олон жил тэтгэж ирсэн ховор олдоцод тулгуурласан бизнесийн загвар ийнхүү сорилттой тулгарч байна.
Лондонд амьдардаг Цай Баочун 2020 оноос эхлэн Birkin цүнхийг худалдан авч, Vestiaire Collective зэрэг цахим платформ болон Instagram-аар дамжуулан дахин борлуулдаг болжээ. Цар тахлын үеэр тансаг хэрэглээний барааны эрэлт огцом нэмэгдэхэд тэрээр чамгүй ашиг олсон байна. Тухайлбал, дэлгүүрт 10,000 ам.долларын үнэтэй цүнхийг хоёр дахин өндөр үнээр худалдах боломжтой байсан аж. Гэвч одоо тэрээр цүнх нөөцлөн худалдан авахаа больжээ.
Би алдагдал хүлээмээргүй байна.
гэж Цай хэлсэн байна.
Түүний мэдээлснээр, огт хэрэглэж байгаагүй Birkin цүнхийг дахин борлуулах үнэ 2022 оны оргил үеэсээ 6,000 ам.доллараас давж буурчээ.
Энэ бол зөвхөн нэг худалдаалагчийн асуудал биш юм. Гол нь Birkin цүнхний үнэ цэнийг олон жилийн турш өсгөж ирсэн гол хүчин зүйл нь ховор олдоц байв. Харин одоо хуучин болон дахин худалдаалагдаж буй цүнхний нийлүүлэлт нэмэгдэж, худалдан авагчид өмнөх шигээ өндөр үнэ төлөх шаардлагагүй болсон байна.
Энэ өөрчлөлт нь Hermès-ийг дэлхийн хамгийн ашигтай тансаг хэрэглээний брэндүүдийн нэг болгосон бизнесийн загварын ирээдүйн талаар эргэлзээ төрүүлж эхэлжээ.
Талийгаач, Их Британи-Францын жүжигчин Жейн Биркиний нэрээр нэрлэгдсэн уг цүнх Hermès брэндийн хамгийн гол бүтээгдэхүүний нэг юм.
2015–2025 оны хооронд Hermès группийн жилийн борлуулалтын орлого гурав дахин өсөж, 16 тэрбум еврод хүрсэн байна. Өнгөрсөн онд тус компанийн үйл ажиллагааны ашгийн маржин 41 хувьд хүрчээ. Өөрөөр хэлбэл, компанийн үйл ажиллагааны 100 еврогийн орлого тутамд 41 еврогийн үйл ажиллагааны ашиг ногдож байв. Энэ үзүүлэлт нь Chanel, Gucci болон Louis Vuitton, Dior зэрэг брэндийг багтаасан LVMH группийн арьсан эдлэл, загварын бизнесийн үзүүлэлтээс өндөр байсан гэсэн үг.
Энэ амжилтын нэг үндэс нь Birkin цүнхийг хүссэн хүн бүр дэлгүүрээс шууд худалдаж авах боломжгүй байдагт оршдог.
Ройтерс агентлагт яриа өгсөн 6 дамлан худалдаалагчийн хэлснээр, Hermès-ийн хэрэглэгчид Birkin цүнх авах боломжтой болохын тулд тус брэндийн ороолт, хувцас, гутал зэрэг бусад бүтээгдэхүүнийг эхлээд худалдан авах шаардлагатай болдог. Энэ нөхцөл нь улс орон, дэлгүүр бүрд ялгаатай боловч зарим хэрэглэгч Birkin эсвэл Kelly загварын цүнх авах санал сонсохын тулд өмнө нь 10'000–20'000 ам.долларын худалдан авалт хийдэг гэж худалдаалагчид тооцоолжээ.
Hermès-ийн мэдээлснээр, нэг Birkin цүнхийг урлахад 15 цаг зарцуулдаг. Гэхдээ тус компани жилд хэдэн цүнх үйлдвэрлэдэг болон хэрэглэгчдэд худалдах бодлогоо дэлгэрэнгүй ил болгодоггүй нууцалдаг гэсэн үг.
Цүнх олдохоо больсон биш, харин дамлан худалдаалж ашиг олох нь хэцүү болжээ
2007 онд тансаг зэрэглэлийн цүнх дахин борлуулах Lilac Blue компанийг байгуулсан Антуанетт Хантер анх Birkin цүнхний захиалга авч байх үед уг загварыг цөөн хүн мэддэг байсан гэж дурсжээ. Тэрээр нэг удаа Японы хааны гэр бүлийн гишүүнээс цүнх худалдан авч байсан аж. Харин одоо Birkin цүнх олж авах нь урьдынх шиг хэцүү биш болсон ч дахин борлуулж ашиг олох боломж улам бүр хаагдах болжээ.
Хантерын хэлснээр, хамгийн эрэлттэй загваруудын нэг болох хар өнгийн, 25 см-ийн Birkin цүнхний дахин дамлах үнэ 2022 оноос хойш ойролцоогоор 4'000 фунт стерлингээр буюу 5'336 ам.доллараар буурч, одоо 24'000 фунт стерлинг орчим болжээ.
Цай яг ийм загварын цүнхийг 20'000 фунт стерлинг орчмоор борлуулдаг байна.
Харин Hermès-ийн Лондон дахь дэлгүүрт уг цүнхний шинэ хувилбар 9'390 фунт стерлингийн үнэтэй байдаг аж. Эндээс харахад шинэ цүнх дэлгүүртээ харьцангуй хямд үнэтэй байхад дахин борлуулах үнэ нь хэд дахин өндөр хэвээр байна. Гэхдээ өмнөх жилүүдэд байсан асар өндөр үнийн зөрүү багасаж байгаа нь дамлан худалдаалагчдын ашгийг бууруулж байгаа юм.
Хантерын хэлснээр, Hermès-ийн цүнхний эрэлт, ялангуяа хамгийн үнэтэй загваруудын эрэлт одоо ч байгаа. Гэвч дэлгүүрийн үнэ өссөөр байхад хуучин цүнхний үнэ буурвал хэрэглэгчид шинээр худалдан авах сонирхлоо алдаж болзошгүй.
Хэрэв Hermès үнээ үргэлжлүүлэн нэмсээр байхад дамын зах зээл дээрх үнэ буурсаар байвал энэ хоёр үнийн зөрүү багасна. Ингэснээр цүнх худалдан авах сонирхол буурч магадгүй.
гэж тэр хэлжээ.
Санхүүгийн шинжилгээний Bernstein компанийн мэдээлснээр, Birkin 25 загварын цүнхний дамын үнэ 2026 оны гуравдугаар улиралд дунджаар дэлгүүрийн үнээсээ 1.7 дахин өндөр байжээ. Харин 2022 оны оргил үед энэ үзүүлэлт 2.6 дахин өндөр байсан байна.
💪🔥 Гурван өдрийн турш үе шаттайгаар зохион байгуулагдаж буй “Physical UHG” спортын тэмцээний эхний өдрийн зургуудаас хүргэж байна. 📸🏆
Hermès-ийн арьсан эдлэлийн салбар, үүнд цүнхний бусад загвар багтдаг бөгөөд группийн жилийн нийт орлогын 44 хувийг бүрдүүлдэг.
Арав гаруй жилийн турш Birkin цүнхний нийлүүлэлт хязгаарлагдмал, эрэлт өндөр байсан нь дамлан худалдаалагчдад ч, Hermès компанид ч ашигтай байв. Хэрэглэгчид цүнхээ хожим нь өндөр үнээр худалдах боломжтой гэж үздэг байсан учраас Hermès-ийн бусад бүтээгдэхүүнийг ч худалдан авах сонирхол нэмэгддэг байжээ.
Калифорнид төвтэй Fashionphile компанийн үүсгэн байгуулагч Сара Дэвис үүнийг “Хоёр талдаа ашигтай тогтолцоо” байсан гэж тодорхойлсон байна.
Түүний компанийн мэдээлснээр, Fashionphile платформ дээр худалдахаар байршуулсан Birkin цүнхний тоо сүүлийн 15 жилийн хугацаанд 32 дахин нэмэгджээ. Одоогоор тус сайтын жагсаалтад 212 Birkin цүнх худалдаалагдахаар байна.
Нөгөө талаас Hermès үйлдвэрлэлээ аажмаар нэмэгдүүлж, гар урлалын шинэ урлангууд нээж иржээ. Тус компани дунджаар жил бүр нэг шинэ урлан нээдэг байна.
Үүн дээр Vestiaire Collective, The RealReal зэрэг цахим худалдааны платформууд болон хуучин тансаг хэрэглээний бараа борлуулдаг дэлгүүрүүд, олон нийтийн сүлжээний хөгжил нэмэгдсэнээр Birkin цүнхийг дахин худалдах боломж эрс нэмэгджээ.
Ройтерс агентлагт яриа өгсөн есөн худалдаалагчийн зургаа нь сүүлийн нэг жилд цүнхний үнэ буурсан гэж мэдээлсэн бол тав нь эрэлт суларсан гэж үзсэн байна.
Hermès-ийн хувьцааны зах зээлийн үнэлгээ энэ онд бараг 40 хувиар буурчээ. Ингэснээр тус компани биржид бүртгэлтэй тансаг хэрэглээний бараа үйлдвэрлэгчдийн дундаас хамгийн муу үзүүлэлттэй компаниудын нэг болсон байна.
Энэ сарын эхээр UBS банк Hermès-ийн хувьцааны үнэлгээг “зарах” түвшин болгон бууруулжээ. Шинжээчдийн үзэж байгаагаар, хоёрдогч зах зээл дээрх Birkin болон Kelly цүнхний нийлүүлэлт нэмэгдэж байгаа нь ховор олдоцод тулгуурласан бизнесийн загварт нь эрсдэл учруулж болзошгүй юм.
Бидний үзэж байгаагаар, энэ бизнесийн мөн чанар өөрчлөгдөж байна.
гэж UBS-ийн шинжээчид тайландаа бичжээ.
Тэдний тооцоолсноор, дэлхий даяар дахин худалдахаар зарласан Birkin болон Kelly цүнхний тоо цар тахлын өмнөх үеийнхээс зургаагаас долоо дахин нэмэгдсэн байна.
Хэрэглэгчид бусад бүтээгдэхүүнүүдийг ч худалдан авах нь багасжээ
Hermès-ийн борлуулалтын өсөлт саарч байгаа нь зөвхөн цүнхний зах зээлтэй холбоотой биш байж магадгүй юм. Visible Alpha судалгааны байгууллагын тооцоогоор, Hermès-ийн улирлын борлуулалтын орлого 2026 оны гуравдугаар улиралд өмнөх оны мөн үеэс 5.2 хувиар өсөх төлөвтэй байв. Хэрэв энэ таамаг биелбэл сүүлийн зургаан жилийн хугацаан дахь улирлын хамгийн сул өсөлт болох байжээ.
Арьсан эдлэлийн орлого 10 хувиар өсөх төлөвтэй байгаа ч хувцас, торгон ороолт, үнэртний борлуулалт саарч байна.
Салбарын зөвлөхүүд болон хувьцааны шинжээчдийн үзэж байгаагаар, энэ нь Birkin цүнх авах боломжтой болохын тулд бусад бүтээгдэхүүнийг эхлээд худалдан авдаг хэрэглэгчид өмнөхөөсөө бага мөнгө зарцуулж байгаагийн дохио байж болох юм.
Hermès-ийн гүйцэтгэх захирал Аксель Дюмагаас энэ оны долдугаар сард үйлдвэрлэлээ бууруулж, брэндийн онцгой байдлыг хамгаалах ёстой эсэхийг асуухад тэрээр хүмүүсийн байр суурь харилцан адилгүй байгааг хэлжээ. Зарим хүн хэт олон цүнх үйлдвэрлэвэл брэндийн ховор, онцгой шинж чанар алдагдана гэж болгоомжилдог бол нөгөө хэсэг нь яагаад илүү олон цүнх үйлдвэрлэдэггүйг асуудаг байна. Дюмагийн хэлснээр, үйлдвэрлэлийн хэмжээ нь бүрэн мэргэшсэн гар урчуудын тоо болон өндөр чанартай арьсны нийлүүлэлтээс ихээхэн хамаардаг аж.
Гэхдээ бүх худалдаалагч зах зээл суларч байна гэж үзэхгүй байна.
Fashionphile компанийн Дэвисийн хэлснээр, тус платформ дээрх Birkin цүнхний үнэ тогтвортой байж, энэ онд бүр бага зэрэг өсжээ. Тэрээр Норвегийн хөлбөмбөгийн од Эрлинг Холандын цүнхний цуглуулга олны анхаарлыг татсан нь эрэлтэд эерэг нөлөө үзүүлсэн байж болохыг дурдсан байна.
Birkin цүнхний үнэ буурч байгаа нь Hermès брэнд нэр хүндээ бүрэн алдсан гэсэн үг биш. Харин өмнө нь цүнхний хомсдол, өндөр үнэ, дахин худалдахад ашиг олох боломж гэсэн гурван хүчин зүйлд тулгуурлаж байсан зах зээл өөрчлөгдөж байгааг харуулж байна.
Цүнхийг дэлгүүрээс худалдан авахад хэцүү, харин дараа нь илүү өндөр үнээр худалдах боломжтой байсан нь хэрэглэгчдийг татдаг байв. Одоо хоёрдогч зах зээл дээрх нийлүүлэлт нэмэгдэж, үнэ буурснаар энэ давуу тал суларч байна.
Hermès-ийн хувьд гол эрсдэл нь зөвхөн Birkin цүнхний үнэ буурах явдал биш. Цүнх авахын тулд бусад бүтээгдэхүүнд их мөнгө зарцуулдаг хэрэглэгчдийн сонирхол буурвал компанийн нийт борлуулалтад ч нөлөөлж болзошгүй.
Өөрөөр хэлбэл, тансаг зэрэглэлийн брэндийн үнэ цэнэ зөвхөн өндөр үнэд бус, хэрэглэгчид тэр үнийг төлөхөд бэлэн хэвээр байх эсэхэд оршдог. Ховор олдоц брэндийн нэр хүндийг өсгөж болох ч зах зээл дээрх хүлээлт өөрчлөгдвөл өмнө нь амжилт авчирсан стратеги нь өөрөө эрсдэл болж хувирч болно.
1 ам.доллар = 0.8911 евро
